Screenshot_٢٠١٧-٠٤-٠٤-١٤-١٣-٢٨-1-1

بين الرجا والخوف تبدا القناعه

بين الرجا والخوف تبدا القناعه
فيمايدبر خالق الكون مقسوم

★★

في دبرتك يارب سمع وطاعه

يامستجيب ليا دعا كل مظلوم

★★

في وقت شفنا فيه ظلم ولكاعه
والسيف حده من شقى الوقت مثلوم

★★

والرمح كل بالرخيصات باعه
والخيل تشكي عزها صار معدوم

★★

والشهم لويبدي براس الرفاعه
قلبه من اللي صار في الوقت مكلوم

★★

غادن من اللوعات روحه ولاعه
لكن حر الطير يفرق عن البوم

★★

اللي ورى الهافين يسحب كراعه
صاير مع العربان شيخ وزيزوم

★★

والذيب من جور الدهر في مجاعه
والا الحصيني مخلبه صار مسموم

★★

وقت (ن) تقلب بين ساعه وساعه
يلبّس العريان تيجان وانجوم

★★

والعز لاهل الدين واهل الشجاعه
رغما على من هو من الدين محروم

★★

ولاهل الكرم واهل الوفى والبراعه

والطيب واللي في المواجيب شغموم

★★

وينزع عن اللي ماتوافق طباعه
دين الرسول اللي من الرب معصوم

★★

اهل البدع ومفارقين الجماعه
وان زانت الايام لابد من يوم

★★

يضفي من الذله عليهم قناعه
وتبقى علامه فوقهم دايم الدوم

★★

وعاشوا رجال يحتمون الوداعه
اهل التقى والدين شيخان واقروم

★★

وعاش الوطن في كل لحظة وساعه
ومرحوم يامن وحد الشعب مرحوم

 

كلمات/ أـ حامد السلمي

عن النشر

اضف رد

لن يتم نشر البريد الإلكتروني . الحقول المطلوبة مشار لها بـ *

*